İsveçrə Konfederasiyasının Xarici İşlər üzrə Dövlət Katibinin müavini “ASAN xidmət” mərkəzi ilə tanış olub

Qonağı Azərbaycan Respublikası Prezidentinin Administrasiyasının Hüquq mühafizə orqanları ilə iş şöbəsinin müdiri Fuad Ələsgərov və  Dövlət Agentliyinin sədri İnam Kərimov salamlayıb.  Qonağa “ASAN xidmət” mərkəzlərinin yaradılması, məqsədləri, inkişaf yolu, həyata keçirdiyi xidmət növləri, həmçinin gələcək planlara dair geniş məlumat verilib. Bildirilib ki, Azərbaycan ixtirası və brendi olan “ASAN xidmət” mərkəzinin fəaliyyətinin məqsədi dövlət orqanlarının xidmətlərinin göstərilməsində vətəndaşların rahatlığının, şəffaflığın təmin edilməsi, korrupsiya hallarının istisna edilməsi, müasir texnologiyaların tətbiq edilməsi, dövlət qulluqçusu-vətəndaş münasibətlərində yeni düşüncə tərzinin formalaşdırılmasıdır.

Qonaq “ASAN xidmət” konsepsiyasını dövlət xidmətlərinin göstərilməsində nümunəvi model hesab edərək, bu təcrübənin dünya ölkələrində tətbiqinin əhəmiyyətini vurğulayıb.

Qonağın diqqətinə çatdırılıb ki, “ASAN xidmət” mərkəzlərində indiyədək 3 700 000-a  yaxın müraciət qeydə alınıb.

“ASAN xidmət” mərkəzində yaradılmış şərait və iş prinsipi ilə tanış olan qonaq mərkəzə gələcək fəaliyyətində uğurlar arzulayıb.