Futbol turniri yekunlaşdı
8 sentyabr 2018-ci il tarixində Bakı Tennis Akademiyasında Gənclər və İdman Nazirliyinin Bakı şəhər Gənclər və İdman Baş İdarəsi və Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin birgə təşkilatçılığı ilə Azərbaycan Xalq Cümhuriyyətinin 100 illiyinə həsr olunan mini futbol üzrə Bakı şəhər açıq turnirinin final oyunları və təntənəli bağlanış mərasimi keçirilib.
Tədbirdə Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev, Bakı şəhər Gənclər və İdman Baş İdarəsinin rəisi Raqif Abbasov, Milli Olimpiya Komitəsinin vitse-prezidenti Xəzər İsayev, Regional Futbol Federasiyasının prezidenti, veteran futbolçu İsgəndər Cavadov, Binəqədi Rayon İcra Hakimiyyəti başçısının müavini Aygün Əliyeva iştirak ediblər.
Agentlik və tabeliyində olan qurumlar arasında təşkil olunan yarışın keçirilməsində məqsəd futbolun təbliğatı, ölkədə bədən tərbiyəsi və idmanın inkişafı etdirilməsi, o cümlədən, qurumlar arasında qarşılıqlı əlaqələrin yaradılması və asudə vaxtın səmərəli təşkilidir.
Mini futbol üzrə Bakı şəhər açıq turnirinin finalında “ASAN Kommunal” və “Qəbələ ASAN” komandaları qarşılaşıb. Gərgin mübarizə şəraitində keçən oyunda “Qəbələ ASAN” komandası qalib gələrək, 1-ci yerin sahibi olub. “ASAN Kommunal” 2-ci, "Quba ASAN" komandası isə 3-cü olub.
Qaliblərə mükafatlar təqdim olunub, xatirə şəkli çəkdirilib.