“ASAN xidmət”in fəaliyyətinə dair hesabat təqdim olunub
28 yanvar 2020-ci il tarixində Elektron Hökumətin İnkişafı Mərkəzində kütləvi informasiya vasitələrinin nümayəndələri üçün “ASAN xidmət”in 2019-cu ildəki fəaliyyətinə dair hesabat xarakterli mətbuat konfransı keçirilib.
Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev təqdimatla çıxış edərək Dövlət Agentliyinin tabeliyində olan qurumlar üzrə xidmətlərə, o cümlədən “ASAN xidmət”ə 2019-cu ildə daxil olan müraciətlərin bölgüsünə, ictimai rəyin nəticələrinə dair statistik göstəricilər barədə məlumat verib.
2019-cu il ərzində elektron hökumət quruculuğu, dövlət xidmətlərinin rəqəmsallaşdırılması, innovasiyaların tətbiqi və startaplara dəstək istiqamətində həyata keçirilən tədbirlər də diqqətə çatdırılıb.
Dövlət Agentliyinin sədri, eyni zamanda müvafiq dövr ərzində icra olunmuş müxtəlif sosial layihələr və beynəlxalq əməkdaşlıq, “ABAD” və ASAN könüllülərinin fəaliyyəti sahəsində görülmüş işləri qeyd edib.
Tədbirdə, həmçinin fəaliyyətə başlayacaq yeni mərkəzlərə, elektron xidmətlərə, idarəetmə sistemlərinin təkmilləşdirilməsinə dair gələcək planlar barədə məlumat verilib.
Sonda kütləvi informasiya vasitələrinin nümayəndələrinin sualları cavablandırılıb.