2 saylı “ASAN Kommunal” mərkəzi fəaliyyətə başlayıb
6 mart 2017-ci il tarixindən etibarən 2 saylı “ASAN Kommunal” mərkəzi vətəndaşlara xidmət göstərməyə başlayıb.
Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədr müavini Ülvi Mehdiyev jurnalistlərə açıqlamasında bildirib ki, 2 saylı “ASAN Kommunal” mərkəzindən Bakı şəhərində qeydiyyatda olan sakinlər yararlana biləcəklər. Mərkəzdə “Azərişıq” ASC, “Azərsu” ASC, “Azəriqaz” İB tərəfindən 45 növ xidmət göstəriləcək.
O, həmçinin qeyd edib ki, yaxın gələcəkdə isə paytaxtda Ukrayna dairəsi yaxınlığında yerləşəcək 3 saylı "ASAN Kommunal" mərkəzinin açılması nəzərdə tutulur. Bu mərkəzdə də vətəndaşlara yüksək səviyyədə xidmət göstərmək üçün bütün şərait yaradılacaq.
Xatırladaq ki, 10 fevral 2017-ci il tarixində Azərbaycan Respublikasının Prezidenti cənab İlham Əliyevin iştirakı ilə 2 saylı “ASAN Kommunal” mərkəzinin rəsmi açılışı baş tutub.
Qeyd edək ki, Azərbaycan Respublikası Prezidentinin 4 may 2016-cı il 890 nömrəli Fərmanı ilə əhaliyə kommunal sahədə xidmətlərin göstərilməsində idarəetmənin optimallaşdırılması və şəffaflığın artırılması, “ASAN xidmət” təcrübəsinin digər xidmət sahələrində tətbiq edilməsi, xidmətlərin daha keyfiyyətli, rahat və innovasiyaların tətbiqi ilə həyata keçirilməsi və bu sahədə vətəndaş məmnunluğunun təmin olunması məqsədi ilə “ASAN Kommunal” mərkəzlərinin yaradılması tapşırılımışdır.